الإثنين , 23 يوليو 2018
الرئيسية / طرازات جديدة / بالعربى .. فيات تيبو الملخص المفيد

بالعربى .. فيات تيبو الملخص المفيد

كتب : على عبده

فيات تيبو بدات في الظهور في اوربا و الشرق الاوسط عام ٢٠١٥ ويتم طرحها فى العديد من الاسواق بأسماء مختلفه في دول اخري زي دودج نيون في الخليج وظهرت في مصر اوائل ٢٠١٧ .، العربية من فئة السيدان المتوسط الحجم بمحرك ١٦٠٠ سي سي ١١٠ حصان وفتيس ياباني ٦ نقلات اتوماتيك (ستيبترونيك) متوفر فيها معظم انظمه الأمان اللى نعرفها و اللي منعرفهاش في مصر من وسائد هوائية ومكابح مضادة للانزلاق وانظمه اخري كتير نشرحها بعدين مع باقي مميزات العربية.

tipo
tipo

ابعاد العربية

• طولها 4.54 أمتار 
• عرضها 1.79 متر 
• ارتفاعها 1.49 متر
• قاعدة العجلات 2.6 متر
• ارتفاع عن الأرض ١٥ سم تقريبا
• حجم الشنطة ٥٢٠ لتر كما يوجد مساحة تخزين داخلين حوالي ١٢ لتر تقريبا

المحرك 
تيبو فيها موتور اسمه E.torQ تم استثمار ٨٣ مليون يورو لتطويره في البرازيل سعة 1.6 لتر من أربعة اسطوانات يولد قوة 110 حصان وعزم 152 نيوتن وناقل حركة اوتوماتيك 6 سرعات وتبلغ سرعة قصوى 192 كم/الساعة والتسارع في 11.2 ثانية وبعض أجزاء المحرك تم تغليفها بالجرافيت “ماده شديدة التحمل” للحد من الاحتكاك وتقليل الوزن واطاله عمر المحرك، وهو نفس المحرك المستخدم في فيات 500X و جيب رينيجيد خارج مصر وعربيات تانية.

الوزن: 1280 كيلو جرام
معدل استهلاك الوقود: 6,2 لتر/100 كم

انظمه الأمان 
كعاده فيات اهتمت جدا بأنظمة الأمان في عربيتها ومنها :-
• احزمه امانه وليها نظام تنبيه مزعج لو مستخدمتش يا تحط الحزام يا تنزل من العربيه
• انظمه تثبيت لكراسي الاطفال
• فرامل مانعه للانزلاق (ABS)
• نظام التحكم الإلكتروني بالثبات (ESC).
• نظام مراقبة ضغط الإطارات (TPMS) مش حاساسات لكن بيعتمد علي حساب عدد لفات الاطار
• نظام للتحكم في عزم السحب والدوران(DTC) 
• نظام للتحكم في السحب (TC)
• نظام للمساعدة في حاله التوقف المفاجئ (PBA) 
• نظام التثبيت في المرتفعات (HDC) 
• نظام لتخفيف فرص الانقلاب (ERM)
• Air bags 
• Center lock

نظام التعليق والثبات

زي باقي عربيات فيات, تيبو تقدر تحس فيها بالثبات والقدرة علي المناورة بسهوله، نظام التعليق الامامي في تيبو عباره عن McPherson مستقل لكل جهة تم اضافه بعض التعديلات عليه لإعطاء ثبات اعلي للعربية وارتياح اكتر في السواقة ودقه في التوجيه و بعض التفاصيل الفنية التي نحن في غني ان نشرحها  مثل التعديلات دي الهدف منها reduce the loss of camber and to increase maximum side acceleration and road-hold في الخلف بيتم استخدام نظام التعليق المعروف interconnected wheel torsion beam. . الخلاصة عفشه العربية ممتازة ونعمه وفي نفس الوقت ثابتة ومريحة و بما ان معظم مشي في كسر فالصراحه عفشه العربيه مريحه جدا و في نفس الوقت علي السرعات العاليه ثابته.

التصميم الخارجي

كأي تصميم إيطالي معروف انه جميل جدا ومتطور ومختلف عن أي عربية تانية الصراحة من الاخر تصميم جميله جدا يخطف العين العربيه شيك الصراحة و تحس ان تمنها معدي .

tipo
tipo

التصميم الداخلي

الصراحة اكتر من واسع و في أماكن تخزين كتير في العربية زي الأبواب ومخدع بين الكراس الأمامية ومخدع خلفي في الهاي لاين و أماكن اخري، عجله القيادة مالتي فانكشن تقدر تعمل منها حاجات كتير زي مكالمات التليفون والتحكم في نظام الصوت و اوامر صوتيه وكمبيوتر العربية وحاجات تانيه كتير غير انها تلسكوبيه بتتظبط زي ما يريحك. بجانب ان الكراسي مريحة وخامتها محترمة يعني ٣ افراد كبار يركبو ورا مرتاحين جدااا.

التكيف 
حلو جدا وقوي ومش بياثر علي سحب العربية حاجه تذكر

الكمايات
العربيه فيها الاتي بغض النظر عن الفئة
• انظمه الأمان المذكورة بالكامل 
• نظام Uconnect باختصار شاشه تاتش بتتحكم فيها في نظام الصوت وبعض الأشياء في العربية وتقدر منها تعمل مكالمات تليفون وتشوف درجه حراره الجو وتشغل الراديو الخ
• follow me باختصار بتخلي العربيه تنور لك مده معينه لحد ما توصل مثلا باب البيت او تقفل الجراج
• إشارات تاتش، يعني لو حتنقل حاره تانيه مش محتاج انك ترفع دراع الإشارة للأخر المسه بس لمسه خفيفة حيدي مؤشر لتغير الاتجاه ٥ مرات تقريبا وبعد كده يفصل لوحده بدون الحاجه انك تلف الدريكسيون
• عداد سرعة ديجيتال وتقدر تخلية بالميل لو تحب.
• قياس لضغط الكاوتش 
• قياسي لشحن البطارية
• اوامر صوتيه
• كمبيوتر رحلات اكتر من رائع 
• شاشه اخري بين العدادات بتعرض لك معلومات كتير زي الأغنية الي شغاله و الرقم الي بتتصل بيه الخ
• كرسي السائق قابل لتعديل الارتفاع
• فوانيس شبوره امامية وخلفية و الأمامية وفيها حركه لطيفة الصراحة انها تشتغل Cornering fog lights يعني لو عطيت اشاره شمال ولقيت الفوج الشمال بس نور متستغربش حيطفي اول ما الإشارة تفصل ولو لفيت الدريكسيون حتلاقي الفوج نور في الاتجاة الي انت رايحه.
• city steering عشان الزحمة والركنه، البور بتاع العربية كهرباء بالمناسبة
• عدادات الحرارة والبنزين رقميه مش مؤشر يعني ومش ارقام في نفس الوقت هي عبارة عن شرط نور شكله لطيف 
• حساس لدرجه الحرارة خارجية
• جنوط اسبور في ال بيز ١٦ و الهاي ١٧
• بتشتغل بنزين ٩٢ عادي جدا 
• مفتاح ريموت شكله لطيف و ممكن تفتح منه الشنطه من الخارج 
• ايموبلايز
• العربية مصفحة صاج النصف الامامي بالكامل 
• اضواء نهارية 
• USB & AUX
• مخرج كهرباء
• مثبت سرعه
• ٤ زجاج كهرباء 
• مرايات كهرباء
• تعديل ارتفاع مستوي الإضاءة الأمامية
• و اكيد انا نسيت حاجات تانيه و كل ده احنا بنتكلم في الاساسيات الي يزيد عليها حاجات كتير في الفئه الاعلي.

شوية حاجات غريبه في العربية
• مفيش غطا لتنك البنزين 
عادي و الله متقلقش ده نظام جديد بيطبق بره من كذا سنه ونازل مصر قريب ومفيش حاجه ينفع تفتح التانك غير مسدس البنزينه او القمع الي جاي مع العربيه
• ومفيش استبن في العربيه

العربية فيها حاجه اسمها Fix & go (quick tyre repair kit) مكان الاستبن و دي قادره انها تصلح اي ثقب في العربيه حتي قطر ٦ ملي لاقدر الله حصل عندك خرم وصلحته ب Fix & go ممكن تمشي بعدها حتي ٦٠٠ كم لحد ما توصل لبتاع كاوتش عشان يشوف المشكله في ايه بالظبط و علي عكس ال run flat و ال spare wheel تقدر تمشي بيه بسرعه حتي ١١٠ كم عادي جدا. واذا لم تجد في مكان للاسبتن ممكن تشري واحد وتحطه في العربيه عادي و حسب ما سمعت ان الدفعه الجديد بتنزل باستبن للسوق المصري عشان المصرين مش متقبلين موضوع ان مفيش استبن ده

الفرق بين الفئة الاولي والثانية
الفئة الثانية فيها حوالي ٢٠ فرق عن الفئة الاولي اهمهم
• جي بي اس 
• كاميرا خلفيه 
• حساس ركن
• خامات الصالون أفضل
• نواكل خارجيه
• جنط ١٧
• مخدع خلفي
• مراية صالون ذاتيه التعتيم
• ٦ ايرباج 
• تكيف ديجيتال
• طي الكنبه الخلفيه
• دعامه للقطنيه
• بالاضافه الي جوده خامات التقفيل في الهاي لاين عن البيز لاين، يعني خامه الطابلوه و الابواب مختلفه و الفرش كمان علي ما اذكر و ده مش حتلاقيه مكتوب في حته.

باختصار و من وجهة نظري الشخصية انا اخترت العربيه دي لتجربتي السابقه مع فيات في الجراند بونتو لمده ٤ سنوات و الحمد لله كانت تجربه جيده جدا و في ظل الأسعار الي في السوق ملقتش احسن و اامن و اريح من التيبو اشتريها بعد بحث و مقارنات كتير، الي فيات بتعتبره اساسيات لا غني عنها عربيات تانيه كتير شايفين انه اوبشنز 
بتنزل في اعلي فئه فقط و بتدفعك قصاده فلوس كتير جدا

العيوب من وجهة نظري

– الآضاءة محتاجه تكون افضل من كده شويه و ان كانت مش وحشه بس الصراحه في ٢٠١٧ علي الاقل العربيه المفروض كانت تكون ليد مش هالوجين و حله انك تغير اللمبات و ده مش بيآثر علي الضمان في حاجه.

– بعض عيوب التقفيل البسيطه زي صوت هواء من باب السائق و ده بيعملو في التوكيل في اول صيان

– في تاخير في استجابه دواسه البنزين عشان كهرباء يعني محتاج تتعود علي دوسه البنزين شويه عشان في تاخير حوالي ثانيتين في الاستجابه

غير كده بامانه مش شايف عيب في العربيه

أسعار قطع الغيار والصيانة

ناس كتير سالت علي اسعار قطع الغيار و الصيانة
انا لسه جاي من التوكيل ودي الاسعار تقريبا من عندهم في وقتها و اكيد ممكن تتغير في اي وقت
الصيانة
١٠ الاف تغير زيت وفلتر فقط ” الزيت Selina ” التكلفه ١٥٠٠ تقريبا
٢٠ الف نفس ال ١٠ + تغير فلتر هواء وتكيف التكلفه ٢٠٠ تقريبا
٣٠ الف نفس ال ١٠
٤٠ الف نفس ال ١٠ + تغير بوجيهات + تغير زيت فرامل + فلاتر
٥٠ الف نفس ١٠ + تغير سير المجموعه
تغير جنزير التقسيمه علي ١٠٠ الف و تقريبا علي ما اذكر زيت الفتيس معاه اذا كنت فهمت صح
اسعار بعض قطع الغيار
اكصدام ٣٥٠٠
فانونوس ٤٠٠٠
تيل ٩٠٠
فتر هواء – تكيف٣٠٠
فلتر زيت ١٥٠
بوجيهات ٨٠٠ تقريبا بتتغير كل ٤٠ الف

شاهد أيضاً

فولفو تطلق S60 السيدان الرياضية الجديدة

كشفت “فولفو للسيارات”، صانع السيارات الفاخرة، النقاب عن “S60” السيدان الرياضية المتوسطة الحجم الجديدة التي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *