الإثنين , 23 يوليو 2018
الرئيسية / خد بالك / 9 أشياء قاتلة أحذرها قبل شراء سيارة مستعملة

9 أشياء قاتلة أحذرها قبل شراء سيارة مستعملة

1 – بلاش تشترى عربية راشة دواخل زى حوض الموتور و داير الباب والشنطة؛ لأن العربية بتبقى عاملة حادثة محترمة والميكانيكي قعد يستعدلها و يعملها زراجين واترشت عشان تداري اللحامات وبتبقى واخدة معجون.
2 – أفتح الكبوت بص على فردة الشاسية وشوف فى لحامات من أى نوع وشوف فى فرق بين الفوانيس و الكبوت والإكصدام ولا لأ، وشوف الفوانيس اللى ورا بايتة صح فى مكانها و مطبعة مع الشنطة ولا فى حاجة خالفة.
3 – شوف لو فى عجل مرحل من مكانه ولا تمام.
4- اقف قدام العربية من النص وبص على السقف شوفة معووج أو مميل يمين أو شمال ولا مستوي وارجع ورا العربية فى نصها بظبط و بص على السقف برضوا عشان كان ممكن تكون عاملة حادثة والعربية اتفتلت واتظبطت.
5- دور الموتور واسمع صوته.. المفروض يبقى هادى مش عالى و الـ RPM عدد لفاتة قليلة وبص على الموتور لو لاقيت عليه زيت أعرف إن الموتور بينفخ وداخل على طقم شمبر.
6- بص على الضفيرة.. لازم تلاقى السلوك كلها فى أنابيب مطاطية و متغلفة.. وافتح الحوض وشوف فى أى سلوك هربانة من مكانها ولا الدنيا تمام وبص على علبة الفيوزات والسلوك اللى بتبقى جوا فى العربية تحت الدريسيكون شمال فوق الركبة، لو لقيت وصلات كتير ملخفنة.
7- العربية اللى راشة حزام نضافة مش أزمة بس يكون حزام نضافة فعلا، عاملة حادثة واتصلحت صح وصاحبها بيقولك مرشوشة نضافة لازم تكشف عليها.
8- الفتيس لو مانيوال يبقى لازم تدوس دبرياج و تجرب كل الغيارات و المهم إن الفتيس يكون سلس معاك و بينقل بسهولة ومينفعش وأنت بتدى غيار يرد عليك لوحده؛ يعنى مينفعش مثلا تكون بتجرب التالت يروح رادد للتانى.. لو أوتوماتيك لازم بقى تطلع تجرب وتلاحظ إن الفتيس نفسه مش طويل فى النقلة بينقل بسرعة ومفهوش صوت خشونة وأنت بتنقل من D لـ R أو أي ترس عموما.
9- لو بتشترى العربية والتكييف بتاعها عطلان على إنه عاوز يتشحن؛ ياريت قبل ما تشترى العربية تجرب التكييف ولو قالك ده عاوز يتشحن اطلع اشحنه عشان تضمن حقك أحسن ما يطلع الكباس بتاع التكييف مفووت و السربنتينة مخرومة وعاوزة تتغير

شاهد أيضاً

الطريقة الصحيحة لقياس معدل الزيت فى سيارتك

يكمن سر الحياة للسيارة فى زيت المحرك حيث يمنحها القدرة على التحرك والعمل ونظراً للمكانة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *