الإثنين , 23 يوليو 2018
الرئيسية / بعيدا عن السيارات / حدوتة التوك توك و التوناية

حدوتة التوك توك و التوناية

كتب: علي عبده

أتذكر و انا في الكلية ابويا اشتري عربيه توناية بعد ما باع العربية الملاكي بتاعتنا و دفع تمنها مقدم للتوناية عشان نزود دخلنا في الوقت الي مفهوش شغل و كنت بشتغل عليها انا و اخويا، رغم ان العربية قسطها مكنش كبير الا اننا كنا عاجزين عن سداده عشان كان كل شويه تتمسك و ندفع ٥٠٠ جنيه غرامه عشان رخصتها ملاكي عشان مفيش ترخيص اجره لحد ما الأقساط اجتمعت علينا و في الاخر بعنا العربية و فلوسها طارت.

الوضع ده للأسف ناس كتير قوي عايشين فيه الي معاه مبلغ صغير و بيدور علي مشروع يستثمر فيه و يشتغل و الي بيشارك حد و يجيبو عربيه و الي عنده شاب او اتنين مش لاقي ليهم شغل و في نفس الوقت الناس محتاجين وسيله انتقال في أماكن كتير مش متوفر فيه موصلات عامه.

التوك توك و التونايه بقي مشروع لناس كتير جدا و لولا احتياج الناس القوي ليهم مكنوش انتشرو بالشكل ده، بس في مشكله كبيره ان الحكومه مش معترفة بيهم و ده خلي وضعهم سئ و خلي التوناية معظم الي راكبينهم معهومش رخص او معاهم رخصه خاصه عشان مرخصين ملاكي عشان ترخيص الاجراء ممنوع.
و التوك توك ممنوع ترخيصه من الاساس فحتلاقي ٩٩٪ من الي السواقين بايع القضية اساسا و ماشي شمال و مش فارق معاه حاجه و ماشي يخبط في خلق الله.

 

الناس اشتريت عربيات و تكاتك بالتقسيط “بنسبه كبيره” عشان توفر دخل علي حل مشكله احتياج الناس لوسيله موصلات في المناطق الشعبية و في نفس الوقت الي الحكومة سمحت فيه باستيراد المركبات دي و حصلت عليها ضرائب و جمارك منعت ترخيصها و في نفس الوقت موجوده في كل الشوارع و شغاله و بتدفع مخالفات و غرامات يوميا.

طيب انت كده اجبرت فئه من الناس تشتغل بشكل غير سليم و غير قانوني و طبيعي ان الوضع ده يجذب ناس غير ملتزمة و مش فارقه معاها حاجه و ده ادي اننا نسمع عن حوادث سرقه و اغتصاب و بلطجة و وقوف في منتصف الطريق و تحميل في الممنوع الخ.

عشان نكون صرحاء الحكومة مش حتقدر توفر بديل للناس دي و وجودهم بقي امر واقع محتاج تقنين في اقرب وقت.

طيب نتخيل كده اننا نصحي الصبح نولع في تكاتك و تونايات مصر كلها و نحتفل بانتصارنا علي تلك الكائنات اللعينة ايه الي حيحصل بعد كده ؟

معظم المناطق العشوائية مش حتلاقي موصلات لانهم بشكل اساسي معتمدين علي التوك توك و التوناية في حياتهم اليومية و الحكومات عجزت علي مدرار ال ٥٠ سنه الي فاتو انك توفر لهم اي وسيله موصلات ادمية.

طيب نعمل ايه في الناس دي نولع فيهم مثلا  و لا نفضل علي الوضع الحالي كل شويه تمسك عربيه و تروح الحضانة تدفع ٥٠٠ جنيه و يجي صاحب العربية الي جايبها بالقسط عشان يفتح بيت يتخرب بيته و يدين و ميعرفش يسد الاقساط و يا يبيع العربيه و يقعد علي القهوه يا يتسجن.

خلينا نبص علي نفس المشكله بس في مكان تاني في مصر، علي الجانب الشرقي من مصر حتلاقي مدينه اسمها الجونة نفس ذات التوك المتضهد  في معظم شوارع مصر بس مغيرين لونه شغال هناك في قمة الانضباط و الشكل الجميل و ليه موبيل ابليكيشن ممكن تطلبه منه و لا في صوت مهرجانات و لا غيره و الناس فرحانين بيه و سعداء، طيب ليه ميكونش ده الوضع في كل محافظات مصر ؟

الموضوع بسيط

اولا انت متقدرش تستغني عن الناس دي عشان معندكش موصلات عامه بتغطي كل المناطق و حتي لو في فهي غير كافيه فلازم تحط الناس دي في اطار قانوني مناسب ليهم و مفيد للبلد و يضمن مستوي خدمه مقبول للناس.

افتح ترخيص اجره مؤقت للعربيات دي مثلا ٣ سنوات و يتجدد حسب الحاجه ليهم و مدي التزامهم و طبيعي عشان السواق يسوق عربيه اجره يكون معاه رخصه مهنيه.

حضرتك حتاخد ضرائب علي العربيه و مؤسسه و كارته الخ يعني فلوس دخله للدوله بدل ما الفلوس بتدوح للبلطجية الي ماسكين المواقف العربية التويتا الي شغاله القاهرة إسكندرية بتدفع حوالي ٥٠- ٧٠ حنيه في كل دور ليها.
– اعمل مدرسه بحق و حقيقي للسواقين عشان يطلعو رخصه مهنيه بشروط ميسره مناسبه لطبيعة عمل العربيات دي

خد انت الف جنيه من كل سواق و دخله مدرسه علمه آداب السواقة و اديه رخصه تكون مؤقته  تجدد حسب التزامه.

التوك توك عليه خلاف قانوني ؟

دول افضل مننا كتير تستخدمه عادي شوف له اطار تحطه فيه و يلزم الي راكبه يكون معاه رخصه و خط سير.

بعد ما تطبق الكلام ده الي تلاقيه مخلاف للشروط امسك العربية شهر و دفعه غرامه كبيره و في خلال ٣ شهور حتلاقي الف العربيات و التكاتك مرخصه و دفعت ملايين الجنيات ضرائب و رسوم و مش حتلاقي حد بيبلطج علي خلق الله و حتريح الناس من المشكله دي و تستفاد و تنمي موارد المحافظات.
طيب تخيل كده قرار علي حته ورقه بترخيص التوك توك و اعطاء مهله ٣ اشهر للترخيص و تسويه الاوضاع و في اخر نفس ذات الورقه ان بعد ال ٣ شهور التوك توك الي مش مرخص و الي سايقه مش معاه رخصه حنولع فيه و خد الف جنيه يا عم عن كل توك توك مرخص في السنه

 

 

 

 

شاهد أيضاً

“جي بي غبور أوتو” تقود صناعة السيارات فى مصر

نجحت مجموعة شركات جي بي غبور أوتو في صناعة اسم لنفسها محققةً الريادة في مجال …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *